Aflaverðmæti eykst þrátt fyrir minni aflaheimildir

Aflaverðmæti íslenskra skipa nam 99 milljörðum króna á árinu 2008 samanborið við 80 milljarða yfir árið 2007. Aflaverðmæti hefur því aukist um 18,8 milljarða eða 23,5% á milli ára. Aflaverðmæti í desember nam tæpum 8 milljörðum  miðað við rúma 5 milljarða í desember 2007. Þetta kemur fram á vef Hagstofunnar.

Aflaverðmæti botnfisks var 70 milljarðar á árinu 2008 og jókst um 15,8% frá fyrra ári þegar aflaverðmætið nam rúmum 60 milljörðum. Verðmæti þorskafla var um 32 milljarðar og jókst um 8,8% frá fyrra ári. Aflaverðmæti ýsu nam 14,1 milljarði og jókst um 3,9% en verðmæti karfaaflans nam 9,2 milljörðum, sem er rúm 58,6% aukning frá árinu 2007. Verðmæti ufsaaflans jókst einnig umtalsvert, það nam tæpum 6,5 milljörðum sem er 52,1% aukning frá fyrra ári.

Verðmæti flatfiskafla nam 6,6 milljörðum á árinu 2008 og jókst um 53,7% frá fyrra ári. Aflaverðmæti uppsjávarafla nam rúmum 21 milljarði, sem er 46,4% aukning milli ára. Verðmæti síldaraflans yfir árið nam rúmum 12 milljörðum sem er 112,7% aukning frá árinu 2007. Verðmæti makríls jókst einnig mikið á milli ára, nam tæpum 4,6 milljörðum samanborið við 1,6 milljarða á árinu 2007.
 
Verðmæti afla, sem seldur er í beinni sölu útgerða til vinnslu innanlands nam 36,8 milljörðum króna, sem er aukning um 14,8% frá fyrra ári. Verðmæti afla sem keyptur er á markaði til vinnslu innanlands jókst um 2,6% milli ára og var tæpir 13 milljarðar yfir árið 2008. Aflaverðmæti sjófrystingar nam 33,8 milljörðum og jókst um 35,1% og verðmæti afla sem fluttur er út óunninn nam rúmum 12 milljörðum, sem er 41,8% aukning frá árinu 2007.(mbl.is)

Allt frá því aflaheimildir þorsks voru minnkaðar hefur aflaverðmætið aukist,sem er asthyglisvert.Það er vegna þess að meira hefur fengist fyrir fiskinn.

 

Björgvin Guðmundsson