VG stærstir í Norðvesturkjördæmi.Frjálslyndir þurrkast út

Verulegar breytingar eru á fylgi stjórnmálaflokkanna í Norðvesturkjördæmi ef marka má nýja Capacent-Gallup könnun fyrir Ríkisútvarpið og Morgunblaðið. Vinstri-græn mælast stærsti flokkur kjördæmisins.

Vinstri græn bæta við sig nærri 10 prósentustigum, fara úr 16 % í kosningunum 2007 í 25,7% í þessari könnun. Samkvæmt þessu bætti flokkurinn við sig þingmanni og fengi tvo. Samfylkingin bætir einnig við sig fylgi; fengi nú 24,7%, en hafði 21,2 % 2007. Samfylking fékk tvo þingmenn kjörna síðast og það yrði óbreytt.

Sjálfstæðisflokkurinn tapar; fær nú 23,9% stuðning en hafði 29,1 % síðast. Flokkurinn tapar einum af þremur sem hann fékk 2007. Framsóknar flokkurinn bætir lítillega við sig frá kosningunum þegar hann fékk 18,8%; fær í könnuninni 19,5%. Það nægir til að flokkurinn fengi tvo menn kjörna í stað eins. Fylgi Frjálslynda flokksins hrynur, fer úr 13,6% 2007 í 3,9% í þessari könnun. Flokkurinn kæmi ekki manni á þing né Borgarfylkingin með 1,9% eða Lýðræðishreyfingin með 0,5%. Skipting jöfnunarsæta er ekki skoðuð út frá niðurstöðum þessarar könnunar en Frjálslyndir fengu jöfnunarsæti í kjördæminu 2007. Heildarúrtak var 800 manns og svarhlutfall 60,2%.(ruv.is)

Þessi fyrsta kjördæmakönnun er athyglisverð.Hún bendir til þess að miklar breytingar geti orðið á fylgi flokkanna.

 

Björgvin Guðmundsson