Dagskrártillaga felld öðru sinni á þingi

Tillaga, sem þingmenn Sjálfstæðisflokks lögðu fram á Alþingi breytingu á dagskrá þingsins var felld með 28 atkvæðum þingmanna Samfylkingar, VG, Framsóknarflokks og Frjálslynda flokksins gegn 19 atkvæðum Sjálfstæðisflokks. 

Tillagan var um að boðaður yrði nýr fundur á Alþingi þar sem frumvarp um greiðsluaðlögun fasteignaveðkrafna á íbúðarhúsnæði yrði fyrst á dagskránni en frumvarp um stjórnlagaþing yrði síðast. 

Sigurður Kári Kristjánsson, þingmaður Sjálfstæðisflokks, sagði að krafa væri um það í þjóðfélaginu að fulltrúar allra stjórnmálaflokka snúi bökum saman að leysa úr vanda heimilanna. Framlagning þessarar tillögu sé framlag sjálfstæðismanna til að svo megi vera. 

Árni Páll Árnason, þingmaður Samfylkingarinnar, sagði að áfram héldi það fáránleikaleikhús, sem Sjálfstæðisflokkurinn efndi til í gær, en þingmenn flokksins lögðu þá einnig fram tillaga um breytta dagskrá. Árni Páll sagði, að látið væri í það skína að það skipti verulegu máli hvort frumvarp um greiðsluaðlögun verði rætt í dag eða á morgun því gildistökudagurinn í frumvarpinu væri 15. maí.

Sturla Böðvarsson, þingmaður Sjálfstæðisflokks, vísaði á bug ummælum Árna Páls um fáránleikaleikhús og einnig ummælum frá Árna Þór Sigurðssyni, sem hann kallaði úrs sal, um að verið væri að misnota málfrelsið á Alþingi. „Hvers konar tal er þetta?" spurði Sturla.

Siv Friðleifsdóttir, þingmaður Framsóknarflokks, sagði sjálfstæðismenn stunda grímulaust málþóf og beittu ýmsum brögðum, m.a. að leggja fram sífelldar dagskrártillögur. Sagðist Siv telja, að þingið hefði gert mistök í gær með því að taka tillögu sjálfstæðismanna þá á dagskrá.(mbl.is

Það er nýtt í þingsögunni,að minnihluti leggi stöðugt fram dagskrártillögur til þess að fá breytt dagskrá.Þetta er ekkert annað en vantraust á forseta,þar eð forseti á að ákveða dagskrá.  Sif Friðleifsdóttir sagði,að það hefðu verið mistök að taka slíka tillögu til atkvæða í gær.Ég er sammmála því. Minnihlutinn getur endalaust flutt slíkar dagskrártillögur og gert þingið óstarfhæft.Forseti getur neitað að taka   slíkar tillögur á dagskrá og hann á að gera það.

 

Björgvin Guðmundsson