60+: Sett verði 100 þús.kr. frítekjumark vegna tekna úr lífeyrisssjóði

60 + ,stjórn eldri borgara í Samfylkingunni hefur opnað heimasíðu.Þar segir svo um málefni eldri borgara í aðdraganda kosninga:

Stjórnin gerir sér grein fyrir því, að þótt margt þurfi að lagfæra í málefnum eldri borgara, þá eru aðstæður í þjóðfélaginu þannig, að umtalsverðir fjármunir verða ekki sóttir í sjóði landsmanna á næstunni. Engu að síður er rétt að halda til haga áherslum og baráttumálum 60+.

Þessar áherslur eru helstar:

1. Stefnt verði að því, að skerðing á lífeyri aldraðra frá almannatryggingum, vegna tekna úr lífeyrissjóðum, verði afnumin í áföngum. Í fyrsta áfanga verði sett 100 þúsund króna frítekjumark á mánuði vegna tekna úr lífeyrissjóðum. Einnig að tekjuskattur af greiðslum úr lífeyrissjóðum verði lækkaður í 10 af hundraði og sæti sömu skattlagningu og fjármagnstekjur.
    
2. Þá er það markmið 60+ að lífeyrir frá almannatryggingum verði hækkaður umtalsvert. Stefnt verði að því, að hjá öldruðum einstaklingum jafngildi hann neysluútgjöldum, samkvæmt könnun Hagstofu Íslands á hverjum tíma. Einnig yrði það mikil kjarabót fyrir eldri borgara ef skattleysismörk yrðu hækkuð.
    
3. Nú ríkir mikið og vaxandi misrétti í greiðslum á makalífeyri frá lífeyrissjóðum. Nauðsynlegt er að stefna að því, að lífeyrisréttindi verði sameiginleg eign hjóna, og réttindi ekki skert eða felld niður við fráfall þess, sem þeirra hefur notið.
    
4. Lyfjakostnaður eldri borgara hefur hækkað verulega á undanförnum misserum. 60+ telur að betur þurfi að standa vörð um hæfilegan lyfjakostnað eldri borgara.
    
5. Stjórn 60+ leggur mikla áherslu á að heimaþjónusta og heimahjúkrun verði forgangsverkefni í þágu eldri borgara. Allt verði gert til að gera þeim kleift að dvelja í eigin húsnæði eins lengi og kostur er. Á þann hátt verða lífsgæði eldri borgara meiri og betri og þessi stefna felur í sér umtalsverðan sparnað í heilbrigðiskerfinu.

Björgvin Guðmundsson