Þjóðhátíðardagur Norðmanna í dag

Norðmenn eru að vonum ánægðir með sigur síns manns í Evróvisjón söngvakeppninni í Moskvu í gærkvöldi og munu væntanlega halda af enn meiri gleði upp á þjóðhátíðardag sinn, sem er í dag, 17. maí. „Þetta var frábær sigur fyrir Noreg," sagði Jens Stoltenberg, forsætisráðherra, í norska sjónvarpinu. „Hann hefur unnið ótrúlegt afrek."

„Alexander þriðji" var fyrirsögnin á fréttavef Aftenposten í nótt og var þar vísað til þess að þetta er þriðji sigur Noregs í Evróvisjón. Hvatti blaðið Norðmenn til að koma með norska fána til Gardemoen flugvallar í kvöld þegar Rybak kemur heim frá Moskvu. 

Norðmenn hlóðu lofi á Rybak á bloggsíðum: „Það er ótrúlegt, að þú skyldir hafa sigrað við hlið allra þessara „karla" sem voru löðrandi í svita og hálfnaktir. Þú ert ekta," skrifaði Hege, 42 ára.

Rybak sigraði með einföldu lagi með austur-evrópsku yfirbragði, danski og fiðluleik. Rybak, sem er 23 ára, fæddist í Hvíta-Rússlandi en er uppalinn á Nesodden, skammt frá Ósló. Hann hefur stundað nám í fiðlu- og píanóleik frá unga aldri. Lagið hans, Fairytale, sem hann samdi sjálfur, fékk 387 stig eða 9,4 stig að jafnaði frá hverri þjóð og 16 þjóðir gáfu laginu 12 stig.   

Rybak var hógvær á blaðamannafundi eftir keppnina í gærkvöldi. „Ég held ekki að ég hafi verið besti söngvarinn í keppninni. En ég sagði sögu og fólki fannst gaman að sögunni minni." 

Úrslit söngvakeppninnar voru mikil skrautsýning og Rússar sýndu þar sitt besta andlit(mbl.is)

Það er alltaf mjög hátíðlegt í Osló 17.mai. Aðalhátíðin er við konungshöllina. Þangað koma strúðgöngur barna og annarra og ganga fram fyrir konungshöllina,þar sem konungur og fjölskylda hans standa úti á svölum. Það er mjög hátíðlegt.

 

Björgvin Guðmundsson