Útlán ILS dragast saman um 30%

Heildarútlán Íbúðalánasjóðs drógust saman um 30% á fyrstu sex mánuðum ársins samanborið við sama tímabil í fyrra. Alls námu útlánin 17,4 milljörðum króna. Í júní námu lánin rúmlega 2,6 milljörðum króna. Þar af voru rúmir 1,9 milljarðar vegna almennra lána og rúmar 700 milljónir vegna leiguíbúðalána.

Heildarútlán sjóðsins jukust um tæp 3,6 % í júní frá fyrri mánuði. Meðalútlán almennra lána voru um 10,6 milljónir króna í júní, sem er aukning um 11% frá fyrri mánuði.

Alls lánaði Íbúðalánasjóður um 8 milljarða króna á öðrum ársfjórðungi, sem er um 15% minna en á fyrsta fjórðungi ársins.

Þann 16. júní hélt Íbúðalánasjóður fjórða útboð íbúðabréfa á árinu 2009. Alls bárust tilboð fyrir 12,195 milljarða að nafnverði. Ákveðið var að taka tilboðum að nafnverði 1,925 milljarða króna í HFF34 á meðalávöxtunarkröfunni 4,13% án þóknunar og 1,575 milljarða króna í HFF44 á meðalávöxtunarkröfunni 4,13% án þóknunar. Útlánavextir sjóðsins lækkuðu um 0,1% í kjölfarið. Nýir vextir íbúðalána eru því 4,60% með uppgreiðsluákvæði og 5,10% án uppgreiðsluákvæðis. Vaxtaákvörðunin tók gildi 18. júní 2009.

Heildarvelta íbúðabréfa í júní nam tæplega 75,3 milljörðum, sem er 17% meiri velta en í fyrri mánuði. Heildarvelta bréfanna nemur 407,8 milljörðum það sem af er árinu 2009.(mbl.is)

Þessi samdráttur er eðlilegur miðað við ástandið í þjóðfélaginu. Íbúðabyggingar hafa  að mestu leyti stöðvast enda var markaðurinn orðinn vel mettaður.

 

Björgvin Guðmundsson