Sérstakur saksóknari gerir húsleit hjá Sjóvá og Milestone

Starfsmenn sérstaks saksóknara eru nú að sækja gögn í höfuðstöðvar Sjóvár og Milestone. Samkvæmt heimildum fréttastofu verður einnig leitað á einkaheimilum.

Rannsókn sérstaks saksóknara lýtur að meintum auðgunarbrotum hjá Sjóvá og Milestone og talið að málið sé eitt umfangsmesta fjársvikamál Íslandssögunnar.

Nú skömmu fyrir hádegi fóru starfsmenn Ólafs Þ. Haukssonar sérstaks saksóknara inn í Sjóvá og fjárfestingafélagið Milestone sem  er í eigu bræðranna Karls og Steingríms Wernerssona en félagið keypti Sjóvá fyrir 3 árum. Hörður Arnarson sem er nýr forstjóri Sjóvár staðfesti nú rétt fyrir fréttir að starfsmenn saksóknara væru þar að leggja hald á gögn.

Hann sagði ennfremur að starfsfólk sitt gerði allt sem í þeirra valdi stæði til að aðstoða þá og að tilkynning um málið yrði send fjölmiðlum síðar í dag. Þá hefur fréttastofa heimildir fyrir því að einnig sé leitað heima hjá Karli og Steingrími Wernerssonum og Þór Sigfússyni fyrrverandi forstjóra Sjóvár.  

Fjárfestingarfélagið Milestone keypti Sjóvá fyrir um 3 árum, en Milestone var þá í eigu bræðranna Karls og Steingríms Wernerssona. Milestone er nú á forræði skilanefndar Glitnis.

Í maí vísaði Fjármálaeftirlitið til sérstaks saksóknara máli, sem laut að meintum auðgunarbrotum hjá Sjóvá, en grunur leikur á að fjármunum Sjóvár hafi verið ráðstafað með ólöglegum hætti. Einkum lýtur rannsóknin að meðferð bótasjóðs Sjóvár, en mjög strangar reglur gilda um meðferð þeirra fjármuna sem þar liggja. Tryggingafélög verða að hafa nóg af innborguðu hlutafé og stofnfé, varasjóðum, óráðstöfuðum hagnaði og skuldabréfum til að geta greitt bótaþegum.

Um tvö og hálft ár eru síðan stjórnendur Sjóvár ákváðu að nota fjármuni bótasjóðsins til að fjárfesta í stórri fasteign á eyjunni Macau í nágrenni Hong Kong. Fyrir hálfum mánuði var greint frá því, að Sjóvá hefði tapað 3 milljörðum á fasteignaviðskiptunum, en eignirnar hafa verið seldar. Fleiri fjárfestingar eru óseldar og því óvíst hvort tapið verður að lokum meira eða minna. Mörg fjárfestingaverkefnana, sem ráðist var í eftir að Wernersbræður eignuðust Sjóvá, voru unnin í samvinnu við Aska Capital, sem einnig var í eigu þeirra bræðra.

 Fjórir til fimm fulltrúar voru hjá Askar Capital að afrita tölvugögn en bankinn hefur upplýsingar um eignir Sjóvá.

Rannsókn málsins teygir anga sína víða og er, samkvæmt heimildum fréttastofu, mjög umfangsmikil og beinist bæði að fyrrverandi eigendum Sjóvár og lykilstjórnendum. Einungis rúmur mánuður er liðinn frá því Þór Sigfússon lét óvænt af störfum sem forstjóri Sjóvár, en hann kvaðst við það tækifæri ekki hafa verið beittur þrýstingi, heldur hefði verið rétt að láta af störfum.(ruv.is)

Ljóst er,að sérstakur saksóknari herðir nú róðurinn og leitar gagna hjá æ  fleiri sem tengjast bankahruninu.Næsta skref hans þarf að vera að frysta innistæður þeirra,sem grunaðir eru.Það má ekki dragast ef takast á að ná í einhverja fjármuni sem komið hefur verið undan.

Björgvin Guðmundsson