Atvinnuleysi minnkar lítillega

Skráð atvinnuleysi í júní 2009 var 8,1% eða að meðaltali 14.091 maður og minnkar atvinnuleysi um 3,5% að meðaltali frá maí eða um 504 manns.  Á sama tíma á árinu 2008 var atvinnuleysi 1,1% eða 1.842 manns.

Vegna árstíðasveiflu eykst áætlað vinnuafl í 174.500 manns í júní eða um rúm 6.700 sem hefur áhrif á reiknað atvinnuleysishlutfall til lækkunar.

 

Atvinnuleysi er nú mest á Suðurnesjum 12,1% en minnst á Vestfjörðum 1,8%. Atvinnuleysi breytist lítið á höfuðborgarsvæðinu en minnkar um 13,7% á landsbyggðinni. Alls staðar dregur úr atvinnuleysi á landsbyggðinni. Hlutfallslega dregur mest úr atvinnuleysi á Austurlandi eða um 101 manns og fer atvinnuleysi þar úr 4,1% í 2,5%.

 

Atvinnuleysi eykst um 4,6% meðal kvenna en minnkar um 8,1% meðal karla. Atvinnuleysið er 8,6% meðal karla og 7,4% meðal kvenna, að því er fram kemur á vef Vinnumálastofnunar.

Langtímaatvinnuleysi eykst og þeir sem verið hafa á skrá lengur en 6 mánuði voru 5.624 í lok júní en 4.836 í lok maí og eru nú um 36% allra á atvinnuleysisskrá. Þeir sem verið hafa atvinnulausir í meira en ár voru 509 í lok júní en 435 í lok maí. Atvinnulausum 16-24 ára hefur fækkað úr í 3.734 í lok maí í 3.526 í lok júní og eru um 23% allra atvinnulausra í júní.

 

Alls voru 1.101 laus störf hjá vinnumiðlunum í lok júní sem er fjölgun um 158 frá því í mánuðinum áður þegar þau voru 943. Þess skal geta að mörg þessara starfa eru ýmis sérstök tímabundin störf og vinnumarkaðstengd úrræði. Flest laus störf voru meðal ósérhæfðs starfsfólks eða 377, og 251 meðal sölu og afgreiðslufólks.

Alls voru 1.803 erlendir ríkisborgarar án atvinnu í lok júní, þar af 1.120 Pólverjar eða um 62% þeirra útlendinga sem voru á skrá í lok júní. Fækkun útlendinga á skrá nemur 200 frá maí. Langflestir þeirra voru starfandi í byggingariðnaði eða 716 (um 40% allra erlendra ríkisborgara á atvinnuleysisskrá).

 Samtals voru 2.583 af þeim sem voru skráðir atvinnulausir í lok júní í hlutastörfum, þ.e. þeir sem eru í reglubundnum hlutastörfum eða með tilfallandi eða tímabundið starf á síðasta skráningardegi í júní. Þetta eru um 17% af þeim sem voru skráðir atvinnulausir í lok júní. Af þeim 2.583 sem voru í hlutastörfum í lok júní eru 1.675 einstaklingar sem sóttu um atvinnuleysisbætur skv. lögum um minnkað starfshlutfall frá því í nóvember 2008. Þeim hefur fækkað frá fyrra mánuði, en þeir voru 1.923 í lok maí og 2.137 í lok apríl.

 

Í júní voru 987 sjálfstætt starfandi skráðir á atvinnuleysisskrá vegna samdráttar í rekstri skv. áður nefndum lögum. Þeim fækkaði frá maí þegar þeir voru 1.189.

Alls fengu 275 launamenn greitt úr Ábyrgðarsjóði launa í júní, 110 í maí, 156 í apríl og 136 í mars. Flestir voru starfandi í þjónustu og útgáfustarfsemi 113 og 101 í mannvirkjagerð og iðnaði.

Yfirleitt batnar atvinnuástandið frá júní til júlí, m.a. vegna árstíðasveiflu, að því er segir í skýrslu Vinnumálastofnunar. Erfitt sé að áætla atvinnuleysi um þessar mundir vegna mikillar óvissu í efnahagslífinu, en líklegt er að atvinnuleysið í júlí 2009 muni lítið breytast og verða á bilinu 8,1%-8,5%.

 

Björgvin Guðmundsson