Of mikill niðurskurður á þorski

Ég tel að það sé verið að fara of bratt í niðurskurð bæði í þorski og ýsu,“ segir Einar k. Guðfinnsson, fyrrverandi sjávarútvegsráðherra um ákvörðun um heildarafla á næsta ári. Þorskkvótinn fer í 150 þúsund tonn og ýsukvóti er skertur um 30 þúsund tonn og verður 63 þúsund tonn.

Einar K. Guðfinnsson sagist fyrir stundu ekki hafa haft aðstöðu til að skoða þetta nákvæmlega en hann ræki augun í tvennt.

„Í fyrsta lagi er það niðurstaða ráðherrans að fara með heildaraflann niður í 150 þúsund tonn í þorski, sem er í raun og veru ákvörðun sem hann tók á fyrstu dögum sínum þegar hann tilkynnti Alþjóðahafrannsóknaráðinu í bréfi að það yrði fylgt 20% aflareglu næstu fimm árin. Ég hefði hins vegar talið skynsamlegast að hann hefði fylgt ákvörðun minni frá því vetur, sem er sú að veiða 160 þúsund tonn á ári á yfirstandandi fiskveiðiári og því næsta og skapa með því ákveðinn stöðugleika gagnvart sjávarútveginum,“ segir Einar K. Guðfinnsson fyrrverandi sjávarútvegs- og landbúnaðarráðherra.

Einar ákvað í janúar sl. að auka hámarksafli í þorski um 30 þúsund tonn. Heildaraflamark á yfirstandandi fiskveiðiári var því 160 þúsund tonn, í stað 130 þúsund tonna sem áður hafði verið ákveðið. Þessi ákvörðun var tekin í ljósi þeirra efnahagserfiðleika sem þjóðarbúið glímir við og með hliðsjón af jákvæðari vísbendingum um stöðu þorskstofnsins sem fram komu í stofnmælingu botnfiska sl. haust. Í þeirri mælingu kom fram að heildarvísitala þorsks væri mun hærri en undanfarin ár. Jafnframt var gert ráð fyrir að á næsta fiskveiðiári yrði heildaraflamark í þorski eigi lægra en 160 þúsund tonn. En það verður eins og áður segir 150 þúsund tonn.

Einar Guðfinnsson segir að niðurskurður í ýsu sé alltof harkalegur.

„Ég út af fyrir sig gagnrýni það ekki að ýsukvótinn sé lækkaður frá yfirstandandi fiskveiðiári en ýsustofninn er hins vegar sterkur. Það væri að mínu mati algjörlega ábyrgt og auðvitað mjög skynsamlegt að fara sér hægar í sakirnar varðandi niðurskurðinn á ýsunni. Ég vil að menn nálgist þessi mál með mjög ábyrgum hætti. Ég tel að við þurfum líka að geta sagt umheiminum að við séum að umgangast okkar auðlind þannig að um sé að ræða sjálfbæra nýtingu. Það sjónarmið virði ég og hef verið talsmaður þess. En ég tel hins vegar að það að fara hægar í sakirnar gagnvart niðurskurðinum í ýsunni og að fylgja þeirri ákvörðun sem ég tók í vetur, væri fullkomlega innan þeirra marka,“ segir fyrrverandi sjávarútvegsráðherra.(mbl.is)

ÉG er sammála Einari. Niðurskurðurinn er of mikill og það virðist nógur þorskur í sjónum.Niðurskurður á ýsu er einnig of mikill.

 

Björgvin Guðmundsson