Er skerðing grunnlífeyris mannréttindabrot?

Á síðasta fundi framkvæmdastjórnar LEB var eftirfarandi m.a. samþykkt:

Framkvæmdastjórn Landssambands eldri borgara (LEB ) fordæmir harðlega þá ákvörðun stjórnvalda að skerða grunnlífeyri frá Tryggingastofnun ríkisins og telur að hér sé jafnvel um mannréttindabrot að ræða. Grunnlífeyrir er uppsafnaður sparnaður eldri borgara, sem þeir hafa allt frá 16 ára aldri greitt til almannatrygginga og koma skal til endurgreiðslu á efri árum. Með því að skerða grunnlífeyri er þessi sparnaður ellilífeyrisþega gerður upptækur.  Ákvörðun stjórnvalda um að skerða grunnlífeyri eldri borgara gerir að engu forsendur fyrir greiðslum eldri borgara til Tryggingastofnunar, sem lagðar voru inn í þeirri góðu trú að þær gætu síðar stuðlað að „áhyggjulausu ævikvöldi“.     

Um leið er farið inn á nýjar og forkastanlegar brautir varðandi til dæmis samspil almannatrygginga-  og lífeyrissjóðsgreiðslna.  Landssamband eldri borgara varar einnig við þeirri stefnubreytingu stjórnvalda að einskorða bætur almannatrygginga einvörðungu við þá sem verst eru settir í samfélaginu. Slíkt kerfi hefur í för með sér svelt velferðarkerfi sem á ekkert sameiginlegt með norrænni velferðarstjórn.

Ég tek undir þessa ályktun LEB. Það er engu líkara en ríkisstjórnin vilji breyta almannatryggingunum í nokkurs konar fátækraframfærslu.Samtök eldri borgara eru algerlega andvíg því.Þau vilja,að almannatryggingar verði eins og áður tryggingar fyrir alla.Þess vegna má alls ekki skerða grunnlífeyrinn.

 

Björgvin Guðmundsson