VG vill halda stjórnarsamstarfi áfram

Það kom fram á fundinum að allir styðja eindregið áframhaldandi ríkisstjórnarsamstarf,“ sagði Guðfríður Lilja Grétarsdóttir, þinflokksformaður Vinstri grænna, að loknum þingflokksfundi síðdegis.

Nokkrir þingmenn Vg eru fjarverandi í dag og mun þingflokkurinn því aftur koma saman til fundar í kvöld.

„Mér finnst skelfilegt að Ögmundur skuli segja af sér sem heilbrigðisráðherra vegna þess að þar missum við einn ötulasta baráttumanninn fyrir góðu íslensku velferðarkerfi úr stærsta og mikilvægasta ráðuneytinu,“ sagði Guðfríður Lilja.

„Hvað Icesave-málið varðar þá hefur hvorki Ögmundur né nokkurt okkar hinna sagt að við værum á móti því sem er hugsanlega í spilunum í Icesave-málinu. Við viljum bara fá að skoða málin, fá þingræðislega, lýðræðislega og opna meðferð málsins. Ögmundur gengur úr ríkisstjórninni vegna þess að það er gerð krafa um að við ríkisstjórnarborðið sé bara ein skoðun á Icesave. Ég lít svo á að hann hafi gengið úr ríkisstjórninni til þess að bjarga henni, vegna þess að þessi krafa er gerð.

Ég trúi því að baráttan í sumar um Icesave hafi orðið mjög til góðs. Þó sagt sé að mikill tími hafi farið í þetta mál í sumar, þá er staðreyndin sú að þingmenn hefðu bara verið í sumarfríi ef þessi umræða hefði ekki farið fram og það gerir að verkum að allir eru núna mjög vel inn í því máli og skilja þaðö til hlítar. Nú snýst spurningin um að málið fái áfram þingræðislega meðferð og þá held ég og trúi að það verði farsællega til lykta leitt,“ segir hún.

Ekkert var rætt á þingflokksfundinum í dag hver tæki við embætti heilbrigðisráðherra í stað Ögmundar. Aðspurð vildi Guðfríður Lilja ekki tjá sig um hvort orðað hafi verið við hana að taka að sér ráðherraembætti.(mbl.is)

Það er gott svo langt sem það nær,að VG er ákveðið í að halda stjórnarsamstarfi áfram. En þingmenn flokksins verða jafnframt að gera sér það ljóst að því fylgir ábyrgð að vera í stjórn og núna er ábyrgðin m.a, að leysa Icesave málið. Þingmenn VG geta ekki bæði verið með og móti í því máli. Þeir verða að styðja tillögu ríkisstjórnar í málinu. Ella er ríkisstjórnin fallin.

 

Björgvin Guðmundsson