Katrín andvíg háum orkuskatti

Katrín Júlíusdóttir iðnaðarráðherra, segir að ekki megi oftúlka það að gert sé ráð fyrir 16 milljarða króna tekjum af umhverfis-, orku- og auðlindasköttum.

Þetta sé óútfærður liður í fjárlagafrumvarpinu. Hún segist aldrei muni samþykkja sérstakan skatt á ákveðna atvinnuvegi. Katrín hefur staðfest við fréttastofu að hún vissi ekki af þessum texta í frumvarpinu og telur framsetningu fjármálaráðuneytisins óheppilega. Óþarfi hafi verið að nefna einnar krónu skatt á hverja kílówattstund, það verði aldrei gerlegt. Nær væri að tala um 10-20 aura í því samhengi. Katrín segir að mikill tími hafi farið í að vinda ofan af þessu máli sem hún telji vera tímasóun. Þá segist hún gera ráð fyrir því að þessir skattar verði lagðir á um áramótin eða strax á næsta ári, þegar búið sé að finna leiðir sem sátt næst um. Hún ítrekar að verið sé að tala um fjölmarga skattstofna sem eigi að standa undir þessum 16 milljörðum.(ruv.is)

Svo virðist sem ekki hafi verið nægilegt samráð milli fjármálaráðuneytis og iðnaðarráðuneytis um orku-og auðlindaskatt. Iðnaðarráðherra telur orkuskattinn of  háan. Væntanlega ná ráðherrar saman um málið.

 

Björgvin Guðmundsson

 

 

•