Það þurfti ekki að skera niður lífeyri aldraðra og öryrkja

Í grein Björgvins Guðmundssonar í Mbl. sl. laugardag (Mannréttindabrot að skerða lífeyri aldraðra og öryrkja) segir svo m.a.:

Í fjárlagafrumvarpinu er gert ráð fyrir því,að ellilífeyrir ( grunnlífeyrir) verði á árinu 2010   8,7 milljarðar,tekjutrygging aldraðra 15,7 milljarðar,örorkulífeyrir 5 milljarðar og tekjutrygging öryrkja  13,4 milljarðar. Þetta er eftir niðurskurð.Ekki eru þetta það háar tölur,að þær setji þjóðarbúið á hliðina.Ellilífeyrir er 1,6% af heildarútgjöldum samkvæmt frv. til fjárlaga.Það hefði mátt sleppa því að skera þessa hungurlús niður eins og gert var 1.júlí sl. Ríkisstjórnin ákvað þá að skera ætti niður í öllum málaflokkum á miðju ári.Sennilega hélt stjórnin að ef hún yrði fljót að skera niður mundi Alþjóðagjaldeyrissjóðurinn verða jákvæður í garð Íslands. Félagsmálaráðherra hljóp fyrstur til og skar niður lífeyri aldraðra og öryrkja með nokkurra daga fyrirvara! Hann var einna fyrstur að skera niður  í stað þess að bíða átekta og sjá fyrst hvað önnur ráðuneyti gerðu. Það var jú búið að segja að hlífa ætti velferðarkerfinu.En þrátt fyrir niðurskurðinn hreyfði AGS sig ekki. Það eina sem skipti sjóðinn máli var að Ísland gengi frá Icesave málinu. AGS var orðin innheimtustofnun fyrir Breta og Hollendinga.AGS var ekki að hugsa að bjarga Íslandi. Hún var að hugsa um hagsmuni Bretlands og Hollands. Það var forgangsverkefni sjóðsins.

Niðurskurður í heilbrigðiskerfinu er einnig tilfinnanlegur. Það er 7 milljarða niðurskurður,sem bætist við niðurskurð undanfarinna ára. Ráðamann Landsspítala segja að það verði að segja upp fleiri hundruð manns miðað við þennan niðurskurð.Það er þegar orðið þannig,að ýmsir sérfræðingar  á spítalanum verða að vinna mikla yfirvinnu nú vegna þess að aðstoðarmönnum þeirra hefur verið sagt upp. Spurning er hvort nokkur sparnaður er fólgin í því.  Það er alveg ljóst miðað við niðurskurð  hjá almannatryggingum og í heilbrigðiskerfinu,að ekki hefur verið staðið við  það fyrirheit ríkisstjórnarinnar að verja velferðarkerfið og enn síður hefur verið staðið við þá yfirlýsingu að koma hér á norrænu velferðarsamfélagi.Ríkisstjórnin verður því að taka sig á.

Þvi má bæta við þessa grein,að tekjur ríkisins aukast um 4 milljarða næsta ár vegna aukinnar skerðingar tryggingabóta af völdum fjármagnstekna.Sú upphæð er svipuð skerðingu lífeyris aldraðra og öryrkja.Þess vegna hefði ekkert þurft að skera niður hjá lífeyrisþegum

Björgvin Guðmundsson

www.gudmundsson.net