Eiga aðilar vinnumarkaðar að ráða eða ríkisstjórnin?

ASÍ og SA eru  hundfúl út í ríkisstjórnina vegna þess,að hún hefur ekki samÞykkt skilyrðislaust kröfu þeirra um að falla frá orku-og auðlindaskatti.Forustumenn ASÍ og SA eru eins og óþekkir krakkar. Ef þeir fá ekki það sem þeir vilja fara þeir í   fýlu.

Aðilar vinnumarkaðarins verða að átta sig á því að þeir eru ekki í ríkisstjórn.Það er ekkert í stöðugleikasáttmálanum frá sl. vori um að ekki megi leggja á orku-og auðlindaskatta.Þar varð aðeins samkomulag um hlutföll,þ.e. hvað skattar mættu gefa miklar tekjur og hvað niðurskurður skyldi gefa mikið.Mér virðist  afstaða fjármálaráðherra skynsamleg: Að  bil beggja: Leggja á hóflega orkuskatta og láta atvinnulífið leggja fram tekjur í öðru formi einnig, þannig,að heildartekjur verði svipaðar og upphaflega var áætlað að orkuskattur gæfi,þ.e. 16 milljarðar.

Eftir að ASÍ og SA tóku upp svo náið samstarf,að  hnífurinn gengur ekki á milli þeirra hefur frekja þeirra aukist. Þeir vilja ráða landstjórninni. En til þess að svo megi verða þurfa þeir að fara á þing og taka þátt í pólitík.

 

Björgvin Guðmundsson