7500 flytjast af landi brott

Fleiri flytjast brott af landinu heldur en til landsins á þessu ári, eins og undanfarin ár. Að óbreyttu stefnir í að fækkun vegna millilandaflutninga verði nærri 5000 á árinu. Í fyrra fækkaði landsmönnum um rúm 6000 á þennan hátt.

Íslenskir ríkisborgarar eru stöðugt vaxandi hlutfall þeirra sem flytjast að og frá landinu síðustu árin. Brottflutningur frá landinu virðist vera minni á þessu ári heldur en í fyrra, þegar hann varð hvað mestur undanfarin ár, þá fluttust hálft ellefta þúsund frá landinu.

Nú stefnir að óbreyttu í að um 7.500 flytjist til annarra landa.

Um leið gerist það að hlutfallslega fleiri íslenskir ríkisborgarar eru í hópi hinna brottfluttu. Þeir voru ríflega þriðjungur 2008, tæplega helmingur í fyrra en nærri 60% á þessu ári.

Sama á við um aðflutta, íslenskum ríkisborgurum fjölgar hlutfallslega mikið í þeirra hópi. Íslenskir ríkisborgarar voru einungis ríflega fjórðungur þeirra árið 2008 þegar alls liðlega tíu þúsund manns fluttu til landsins.

Aðfluttum fækkar hins vegar, í fyrra voru þeir tæplega 5.800, en þar af 4 af hverjum tíu íslenskir ríkisborgarar og á þessu ári má sjá byltingu í þessari samsetningu, átta af hverjum tíu sem hingað flytjast eru íslenskir ríkisborgarar. Erlendir ríkisborgarar virðast að mestu vera hættir að flytjast hingað til lands. Það sem af er ári eru þeir aðeins 341 talsins.

Ef fyrstu átta mánuðrinir eru skoðaðir frá árinu 2007 má sjá að brottfluttir hafa öll árin verið fleiri en aðfluttir.  Munurinn er mestur í fyrra þegar um 4.200 fleiri fluttu á brott heldur en komu. Séu heil ár skoðuð er munurinn einnig mestur í fyrra, 6.400 fleiri fóru heldur en fluttust til landsins. Að óbreyttu stefnir í að á þessu ári fari 4.700 fleiri af landi brott heldur en hingað flytjast. Öll fjögur árin samanlagt rúmlega 20 þúsund manns. (ruv.is)

 

 Björgvin Guðmundsson