Steingrímur: Skattar lágir á Íslandi miðað við önnur Norðurlönd

Steingrímur J. Sigfússon, fjármálaráðherra, segir að ný skýrsla Alþjóðagjaldeyrissjóðsins vitni um að góður árangur hafi náðst í ríkisfjármálum á síðasta ári. Þeir sem haldi öðru fram verði að fara að horfast í augu við veruleikann.

Fjármálaráðherra flutti ræðu á árlegum Skattadegi Deloitte í morgun. Þar sagði hann að það stefndi í að ríkið fengi allt að 1% meira í tekjur á árinu en tekjuáætlun fjárlaganna hafi gert ráð fyrir. Hrakspárnar um að verið væri að skattleggja tekjustofnana niður hafi því ekki reynst réttar.

Steingrímur sagði að þrátt fyrir breytingar sem gerðar hafi verið á skattkerfinu séu skattar almennt lágir á Íslandi miðað við önnur Norðurlönd. Þó sé efra þrep virðisaukaskatts hæst hér. Hann sagði að vissulega væri verið að stíga svolítið fast til jarðar í sambandi við samanlagða skattlagningu fjármagnstekna og auðlegðarskatta en með því sé verið að ætlast til að ríkasti hluti Íslendinga leggi dálítið af mörkum að minnsta kosti tímabundið á meðan þjóðin fleyti sér í gegnum erfiðleika. Fjármálaráðherra spurði þá hvort eitthvað væri að því?

Hann sagði að tekist hefði að dreifa skattbyrðinni á sanngjarnari hátt og hlífa þannig þeim tekjulægstu. Steingrímur sagði fjórðu endurskoðun efnahagsáætlunar Alþjóðagjaldeyrissjóðsins og íslenskra stjórnvalda sem samþykkt var í gær staðfesta að góður árangur hafi náðst í ríkisfjármálum. Hann sagðist verða að segja þetta sjálfur því hæla þurfi sjálfum sér ef enginn annar gerði það. Steingrímur sagði að kannski kæmi sannleikurinn að utan og einhverjir fari að horfast í augu við að verið væri að ná miklum árangri og hann væri mjög mikilsverður.(ruv.is)

Ég er ánægður með skattastefnu ríkissjórnarinnar. Þeim lægst launuðu hefur verið hlíft en skattar auknir á hinum tekjuhæstu.Það er rétt skattastefna.

 

Björgvin Guðmundsson