Breytir Sjálfstæðisfl. stefnu sinni í Evrópumálum?

Evrópupólitíkin verður mjög fyrirferðarmikil innan Sjálfstæðisflokksins á næstunni. Rótfastri stefnu flokksins gegn ESB-aðild verður ekki breytt á milli landsfunda en margt bendir til að þessi mál verði eitt stærsta viðfangsefni og væntanlega átakamál næsta landsfundar flokksins, sem haldinn verður haustið 2009.

Þetta er skoðun fjölmargra innan Sjálfstæðisflokksins. Að mati sjálfstæðismanna sem talað var við er Evrópuumræðan öll að breytast og kaflaskil að verða í Evrópumálunum innan flokksins.

Andstaða við aðild að ESB er áberandi á landsbyggðinni og innan sjávarútvegsins en í fréttaskýringu í blaðinu kemur fram að innan sjávarútvegsins séu menn farnir að skoða gaumgæfilega hvaða áhrif það hefði í sjávarútvegi ef evran yrði ráðandi.(mbl.is)

Fróðlegt verður að sjá hvort Sjálfstæðisflokkurinn breyti stefnu sinni í Evrópumálum. Líklegt er,að flokkurinn stígi eitt nýtt skref í átt til ESB.

Björgvin Guðmundsson

 

Til baka

 

Tekist á um ESB á næsta landsfundi

Athugasemdir

[Guðbjörn Guðbjörnsson, 19.7.2008 kl. 17:39]

Það er mín skoðun - sem sjálfstæðismaður - að ekki sé hægt að bíða í eitt ár til að fá niðurstöðu í ESB umræðuna innan Sjálfstæðisflokksins.

Verði málinu frestað 15-16 mánuði, gæti það haft mjög alvarlegar afleiðingar fyrir fylgi flokksins. Viðbúið er að stór fjöldi hægrikrata innan Sjálfstæðisflokksins færi sig ekki aðeins tímabundið í skoðanakönnunum yfir til Samfylkingarinnar, heldur setjist þar að. Þetta fer þó alfarið eftir því, hvort Samfylkingin sýnir af sér festu og ábyrgð á næstu mánuðum.

Sjálfstæðismenn myndu taka það mjög óstynnt upp, sliti Samfylkingin þessu stjórnarsamstarfi á næstu mánuðum og boðað yrði til nýrra kosninga. Eins víst er að þeir myndu flykkja sér aftur í kringum sinn gamla flokk. Samfylkingin á því mikil tækifæri í stöðunni eins og hún er í dag.

Sjálfstæðisflokkurinn gæti einnig verið í sterkri stöðu ef tekst að ná sátt um ESB aðildina. Haldi flokkurinn sig hins vegar við núverandi stefnu, er viðbúið að nýr hægri flokkur verði stofnaður næsta vetur. Sá flokkur hefði ekki aðeins stuðning a.m.k. 50% sjálfstæðismanna, heldur einnig Samtaka iðnaðarins, Samtaka verslunar og þjónustu og Samtaka íslenskra stórkaupmanna - það munar um minna. Sjálfstæðisflokkurinn stæði hins vegar með L.Í.Ú. á bak við sig, en vægi þeirra samtaka hefur að sjálfsögðu minnkað mjög hratt undanfarin ár og á eftir að minnka meira þegar tvö 350.000 tonna álver bætast við í Helguvík og á Bakka.

Klofni flokkurinn út af þessu máli er ekki víst að hann sameinist aftur. Það hefur alla tíð verið ágreiningur á milli frjálshyggjuaflanna í flokknum og þeirra sem líta ekki á markaðslögmálin sem trúarbrögð. Flestum hægrikrötum finnst að nú eigi flokkurinn að hægja á sér í frekari markaðsvæðingu og velta hverju skrefi fyrir sér varðandi einkavæðingu heilbrigðisþjónustunnar og menntakerfisins að ég tali nú ekki um orkugeirann. Viðbrögðin varðandi kaup Geysir Green Energy og Orkuveitunnar og REI í vetur eru skýr dæmi um að fara þarf varlega. Ekki má fara eins með einkavæðingu þessara geira og einkavæðingu bankanna.

Verði til annar alvöru hægri flokkur, sem er með fæturna á jörðinni, styður stóriðju og aðra uppbyggingu atvinnuveganna, ESB aðild og upptöku evru, en vill aðeins mýkri hægri áherslur en hörðustu frjálshyggjumennirnir innan flokksins, þ.e.a.s. kjósa markaðsvæðingu í heilbrigðiskerfinu og í menntakerfinu, en vilja fara sér hægar og velta hverju skrefi vel fyrir sér, er hætta á að stórt skref yrði hoggið í raðir sjálfstæðismanna og þá er ég ekki að tala um eitthvað á borð við Frjálslyndaflokkinn, heldur tvískiptingu hægri vængsins líkt og hjá VG og Samfylkingur.

[Gunnlaugur Ingvarsson (IP-tala skráð) 19.7.2008 kl. 20:49]

Heill og sæll Björgvin.

Við skulum rétt vona, sjálfstæði og stolti þjóðar okkar vegna að Sjálfstæðisflokkurinn muni standi í ístæðinu gagnvart þessu ESB máli og verði áfram andvígur aðild Íslands af þessu "Bandalgi Andskotans". Þá stendur Sjálfstæðisflokkurinn undir nafni í sjálfstæðisbaráttu okkar hinni síðari sem nú er greinilega hafin. Ég hef nú ekki trú á því að Flokkurinn breyti um stefnu í þessu máli þó svo að einstaka þingmenn kanski séu og eða verði svagir fyrir aðild. Málið er nefnilega að það eru svo fjölmargir mjög sterkir einstaklingar í forystu- og þingmannasveit Flokksins sem eru sem betur fer svarnir andstæðingar ESB aðildar. Nú hlakkar í ykkur ESB sinnum vegna niðurstaðna í þessari skoðanakönnun frá því í morgun, þar sem þið teljið stóran meirihluta þjóðarinnar með aðild. Horfa ber til þess að það voru Samtök atvinnulífsins sem gerðu þessa könnun og spurningar eru allar mjög leiðandi og túlkunin á niðurstöðum könnunarinnar er líka með eindæmum, bæði frá SA og ekki síður fjölmiðlakórnum. En það var svo sem ekki við öðru að búast frá þeirri fjölmiðla áróðurssveit ykkar ESB sinna. Það þarf t.d. alls ekki að þýða það sama að vilja skoða aðildarviðræður og að vilja ganga í Evrópusambandið, en þannig leyfa Íslensku ESB- fjölmiðlarnir sér að túlka málið, kinnroðalaust. Það þarf enginn að segja mér það að þetta yrði niðurstaðan ef kæmi til raunverulegra kosninga um aðild eða ekki aðild að ESB. Núna er efnahagsástandið á Íslandi slæmt eftir langvarandi mikinn efnahagsuppgang. En ástandið er ekki bara slæmt á Íslandi það er slæmt um allan heim, vegna lánsfjárkreppu og mikla hækkun á olíu og öðrum hrávörum. Þetta slæma ástand notið þið ESB sinnar á Íslandi ykkur blygðunarlaust til framdráttar. Hjá ykkur helgar tilgangurinn einn meðalið. Mér liggur við að segja að sumt af þessum þjóðhættulega áróðri ESB trúboðsins hér á landi jaðri við að kalla megi landráð. Tal um ónýtan gjaldmiðil og að allt verði svo miklu betra við aðild að þessu Bandalagi, gerir bara stöðuna enn verri og grefur undir trúverðugleika þjóðarinnar og efnahagslífsins.  Aumt er það orðið þegar það er orðið helsta baráttu- og hugsjónamál Jafnaðarmannaflokks Íslands að koma frelsi okkar og fullveldi í gin þessarar risaeðlu ESB. Til hvers var barist fyrir frelsinu og fullveldinu. Nöturlegt er það líka að þú Björgvin sem ert barn lýðveldiskynslóðarinnar og sem staðið hefur vaktina í stjórnmálum þessa lands á seinni hluta síðustu aldar og oft barist vel fyrir raunerulegri jafnaðarmennsku og oft  fyrir mögum góðum framfaramálum fyrir land okkar og þjóð sért nú fallinn fyrir þessu villuljósi frá Brussel og genginn þessu ömurlega ESB trúboði á hönd. Því að í ESB  höfum við Íslendingar ekkert að gera og það yrði okkur ekki til framdráttar á neinu sviði, nema síður væri. 

Þó svo að staðan í skoðanakönnunum sé svona rétt núna, þá þori ég að fullyrða það að hún yrði ekki svona ef gengið yrði til alvöru kosninga um þessi mál, þá yrði aðild sem betur fer hafnað afdráttarlaust af meirhluta þjóðarinnar. Ég minni á að áður en frændur vorir og vinir Norðmenn kusu í fyrra skiptið um inngöngu í ESB, sem þeir svo höfnuðu, þá var ástandið enn meira yfirþyrmandi þar á bæ. Þá voru nánast allir stjórnmálaflokkarnir og leiðtogar þeirra búnir að lýsa yfir stuðningi við aðild, ekki bara Krata flokkurinn. Samtök atvinnurlífsins og öll verkalýðshreyfingin eins og hún lagði sig, höfðu þá um nokkura ára skeið barist af oddi og egg fyrir aðild. Sama var og hér, nánast allir fjölmiðlarnir og háskólafólkið lofsungu aðild í hásterrt. Allar skoðanakannanir sýndu mikinn meirihluta við aðild. En svo þegar að alvörunni var komið og farið var að kynna þetta og ræða þetta fyrir alvöru meðal þjóðarinnar, þá fjölgaði stöðugt í hópi þeirra sem andvígir voru aðild og svo í sjálfum kosningunum sagði Norska FÓLKIÐ - NEI takk - á afgerandi hátt í þjóðaratkvæðagreiðsluni. Svo varð auðvitað að kjósa aftur nokkrum árum seinna, því "elítan" gat bara alls ekki skilið þetta hvað fólkið var að gera þeim. En aftur hafnaði Norska FÓLKIÐ aðild Noregs að ESB. Það var annar sigur fólksins og lýðræðisins á "elítuni" og á skrifræðinu og miðstýringunni. Síðan þá hafa ESB sinnar í Noregi farið með veggjum en sumir hverjir reyndar heyrst tuldra fyrir munni sér nú uppá síðkastið að þetta hafi nú svo sem verið hið besta má allt saman hvernig þetta fór, svona eftir á að hyggja.

Nákvæmlega það sama mun gerast hér. ESB trúboðið með allri sinni áróðursmaskínu mun á endanum koma okkur út í kosningar um þetta mál og nákvæmlega sama mun gerast hér og í Noregi, við munum fella þetta með afgerandi hætti. Líklegt er að "elítan" muni reyna að koma okkur í aðrar kosningar fljótlega aftur, en það mun engu breyta við munum kolfella þetta mál AFTUR, alveg eins og frændur okkar ! Það munum við gera vegna þess að almenningur á Íslandi alveg eins og í Noregi er mjög duglegt og skynsamt fólk upp til hópa, sama hvar það stendur í pólitík og þegar það fer að skoða sjálfan keisarann frá Brussel og fínu fötin hans þá munu langflestir sjá það greinilega nema auðvitað "elítan" að hann er algerlega klæðalaus þessi vesæli keisari ! 

LIFI FRJÁLST OG FULLVALDA ÍSLAND !  ÍSLANDS ÞÚSUND ÁR !       

[Fannar frá Rifi, 20.7.2008 kl. 00:14]

Já það væri nú gott að geta komist úr þessari ömurlegu stöðu sem við höfum hérna með 1% atvinnuleysi og komist inn í draumaríkið og orðið eins og Írland þar atvinnuleysi er bara 5%. Reyndar er óskabarn ESB sinna reyndar svo illa laskað að þar er talað um af alvöru að henda evrunni og taka upp aftur sjálfstæðan gjaldmiðills.

Eða við gætum kannski bara beintengt okkur eins og Danir sem eru komnir í kreppu. 

Eða ættum við kannski að stefna á að verða eins og Frakkland og Þýskaland og búa við 10% atvinnuleysi. Þessi lönd hafa búið við atvinnuleysi sem jafnast á við atvinnuleysis tölur úr kreppunni miklu og það á tímum þegar efnahagur alls heimsins blómstraði. nema hjá þeim. 

Kannski verða fyrirtækinn okkar eins og Eurobus þar sem menn þar á bæ tala um að flytja alla framleiðslu frá Evrópu vegna of hás gengis Evrunar.

Galdralausnir eru ekki til. Evran og ESB eins og af þeim er látið eru ekki til.

Bara sama gamla þulan endurtekinn með einni breytingu. Brussel-Ísland Draumalandið, hvenær kemur þú?