Geir: Aðildarviðræður við ESB koma til greina

Geir H. Haarde forsætisráðherra sagði í þættinum Vikulokin á Rás 1 í morgun að honum þætti koma til greina að óskað yrði eftir aðildarviðræðum við Evrópusambandið á þeim forsendum sem hentuðu Íslendingum. Gæta yrði að þjóðarhagsmunum og auðlindum landsins og ef hægt væri að fá samning sem tæki tillit til þessa væri það nokkuð sem þyrfti að athuga. Skoða yrði svo kosti og galla slíks samnings og taka í lokin afstöðu með eða á móti.

„Mér finnst alveg koma til greina að við stígum skrefi lengra með þetta mál, þ.e.a.s. óskum eftir aðildarviðræðum á forsendum sem okkur henta. Þ.e.a.s. þeim að við gætum okkar þjóðarhagsmuna í hvívetna og okkar mikilvægustu auðlinda. Ef hægt er að fá samning út á slíkt þá er það eitthvað sem þyrfti að athuga en það þyrfti að leiða í ljós hverjir kostirnir eru. Á endanum þegar þetta mál er til lykta leitt, hversu langan tíma sem það tekur, verða menn að segja annaðhvort já eða nei,“ sagði Geir.

Geir sagðist þó ekki vilja leggja neitt til á þessarri stundu þar sem unnið væri að málinu innan Sjálfstæðisflokksins. Hann sagði að sú vinna sem færi fram innan Sjálfstæðisflokksins fyrir flokksfundinn í janúar væri endurmat á þeim forsendum sem afstaða Sjálfstæðisflokksins hafi byggst á fram til þessa. Komi í ljós að forsendurnar hafi breyst, m.a. vegna yfirsteðjandi erfiðleika, verði Sjálfstæðisflokkurinn reiðubúinn til að endurskoða afstöðu sína í Evrópusambandsmálum.(mbl.is)

Þetta er mjög athyglisverð yfirlýsing hjá Geir Haarde. Þetta er í fyrsta sinn,sem hann telur koma til greina að hefja  aðildarviðræður við ESB.Það  fer mikið eftir þvi hvað hann leggur til á landsfundi hvernig málið verður afgreitt

 

Björgvin Guðmundsson

Aðildarviðræður koma til greina

Athugasemdir

[Gísli Ingvarsson, 6.12.2008 kl. 15:44]

Mín predíkun í tilefni dagsins er sú að menn geri sér grein fyrir því hvaða alvara felst í því "að fóska eftir aðildarviðræðum". Þær enda væntanega með samkomulagi. Það verður síðan að leggja pólitískan heiður sinn og sannfæringu að veði að þjóðin samþykki plaggið. Ef menn meina eitthvað með þessu tali á að leggja strax fram stjórnarskrárbreytingu svo engin formsatriiði vanti upp á fulla aðild. Þeas ef menn hafa stjórnarskrána sem viðmiðun yfirleitt. Ég hef hugsað talsvert um ESB aðild og styð hana í grundvallaratriðum en nenni ekki að taka þátt í neinu hálfkáki sem menn geta svo hlaupið frá ef þeim hentar vegna tilfallandi kosninga eða annara skammtímasjónarmiða.

[Jón Valur Jensson, 7.12.2008 kl. 03:16]

"Forsendur sem henti Íslendingum" eru ekki til; lagarammi Evrópusambandsins sker úr um það, sem og réttur bandalagsins til nýrrar löggjafar, sem við myndum ekkert ráða við og gætum ekki komið í veg fyrir.