Óeðlilega lágt orkuverð til álvera hér

Norðurál greiðir um fjórðungi lægra raforkuverð en álver í heiminum að meðaltali. Þetta kemur fram í trúnaðarskýrslu sem fréttastofan hefur undir höndum.

Orkufyrirtækin virðast bera megnið af áhættunni sem felst í verðsveiflum á álmarkaði.

Skýrslan er frá Hatch ráðgjafafyrirtækinu og er gerð fyrir erlenda banka og Norðurál. Hún er stimpluð algert trúnaðarmál en þar er byggt á rauntölum úr rekstrinum, þar á meðal um orkuverð. Á þeim tíma sem skýrslan er gerð borgaði Norðurál fjórtán mill fyrir kílóvattsstundina. Mill er einn þúsundasti úr dollar þannig að fimmtán mill eru eitt og hálft cent - jafngildi tveggja króna. Heimili landsins borga til samanburðar rúmlega tíu krónur fyir kílóvattsstundina. Raforkuverðið er tengt álverði sem var fjórtán hundruð dollarar fyrir tonnið á þessum tíma. Ef áltonnið hækkar í fimmtán hundruð dollara hækkar orkuverðið í fimmtán mill.

Álverð hefur verið um fimmtán hundruð dollarar tonnið síðustu áratugi en verðið sveiflast mikið. Helstu sérfræðingar spá því að meðalverð lækki lítillega á næstu áratugum.  Rekstrarforsendur Norðuráls gerðu ráð fyrir fjórtán hundruð dollurum fyrir hvert áltonn. Fram kemur í skýrslunni að Norðurál er að borga fjórðung undir því sem álver í heiminum borga að meðaltali fyrir raforku.

Þó að þetta séu samningar um fyrir aðeins eitt álver, telur Dr. Sigurður Jóhannesson hjá Hagfræðistofnun að stóriðjan sé almennt að borga sama verð.

Lága raforkuverðið og áhættulaus tenging iðjunnar við álverð hefur ekki farið framhjá mönnum. Á einni síðu fyrir fjárfesta er hvatt til að kaupa hlutabréf í móðurfélagi Norðuráls og vísað til Íslandsverkefna þar sem menn þurfi aldrei að hafa áhyggjur af rafmagnsreikningnum.

Í raunkostnaðartölum sem birtast í skýrslunni kemur fram að vegna ódýrrar raforku sé Norðurál að fá ríflegan þriðjung af söluverði áls í hagnað fyrir skatta, afskriftir og fjármagnsliði. Álverið skilar líklegast þrisvar sinnum betri arðsemi en til dæmis Landsvirkjun fær af sínum fjárfestingum. Orkufyrirtækin virðast axla megin þungann af þeirri áhættu sem felst í verðsveiflum á álmarkaði.

Trúnaðarskýrslan frá HATC sýnir sláandi rekstrar- og afkomutölur. Fyrir hvert áltonn þarf að borga ríflega 320 dollara fyrir súrálið, 220 fyrir rafmagnið og rúmlega 120 fara í laun.

Heildarkostnaður á hvert framleitt áltonn er tæplega þúsund dollarar. Þarna var áltonnið selt á tæplega 1400 dollara og er EBITDA, hagnaður fyrir skatta, fjármagnskostnað og afskriftir vel yfir 400 dollarar á tonnið.

Sigurður segir að Landsvirkjun gefi upp arðsemi sinna framkvæmda upp á fimm prósent en það láti nærri að arðsemi álverseigandans sé að minnsta kosti þrisvar sinnum meiri.(ruv.is)

Þetta er óeðlilega lágt orkuverð og ekki forsvaranlegt að láta álverin hér greiða svona lágt fyrir orkuna.Auk þess er pukrið með orkuverðið óásættanlegt.

Björgvin Guðmundsson