Alcoa hefur enn áhuga á að reisa álver á Bakka

Tómas Már Sigurðsson, forstjóri Alcoa á Íslandi, segir að fyrirtækið hafi enn fullan hug á að reisa álver á Bakka. Hann undrast orð iðnaðarráðherra frá því í gær um minnkandi áhuga og bendir á að enn sé grundvallarspurningum um orkumagn og afhendingartíma ósvarað. Á meðan sé óvíst hvort álver á Bakka sé raunhæfur kostur.

Katrín Júlíusdóttir iðnaðarráðherra sagði Kastljósi í gær að hún væri svartsýnni en áður á að Alcoa myndi reisa álver á Bakka. Erlenda móðurfélagið hefði ekki samband og sýndi óeðlilega lítinn áhuga. Tómas Már segir að áhugi Alcoa á því að reisa álver á Bakka hafi alls ekki minnkað enda hafi fyrirtækið unnið að verkefninu í fimm ár og farið eftir viljayfirlýsingum. Hann segir að tímaáætlanir hafi riðlast vegna kröfu um sameiginlegt umhverfismat. Það hafi tekið um tvö ár og ekki sjái fyrir endann á því aftur. Ekki hafi verið hægt að fara í tilraunaboranir og því sé því enn ósvarað hve mikil orka sé til og hvenær verði hægt að afhenda hana.

Í viðtalinu í gær setti iðnaðarráðherra þrýsting á Alcoa þegar hún sagði að það væri mikilvægt að finna kaupanda sem fyrst og að ekki væri hægt að halda orkunni frátekinni. Forstjóri Alcoa undrast að nú sé rætt um að önnur fyrirtæki kaupi orkuna. Alcoa hafi fengið bréf frá verkefnisstjórn í maí um að fyrirtækið uppfyllti flest skilyrði og væri lengst komið. Alcoa vinni ná að umhverfismatinu og það gæti orðið tilbúið í september.

Katrín sagði í viðtalinu í gær að viljayfirlýsing hafi verið gerð um 250 þúsund tonna álver en skömmu seinna segist fyrirtækið vilja byggja 360 þúsund tonna álver. Erfiðara verði að útvega orku handa svo stóru álveri. Tómar Már segir að Alcoa hafi alltaf gert sér grein fyrir því að áverið yrði byggt í áföngum. Það er hagkvæmt að reka stærra álver; af svipaðri stærð og álverið í Reyðarfirði.(ruv.is)

Það er ánægjulegt að Alcoa hefur enn áhuga á því að reisa álver á Bakka.Ef af verður mundi Alcoa fyrst reisa 250 þús. tonna álver en síðan reyna að reisa viðbót síðar. Það er ljóst,að reipdráttur er um orkuna sem er til reiðu fyrir norðan.En Alcoa hefur vissulega vissan forgang.

 

Björgvin Guðmundsson