Ríki OECD greiða margfalt meira til eftirlauna aldraðra en íslenska ríkið!

 

Skipta má lífeyrisfólki í tvennt; annars vegar eru þeir sem greitt hafa í lífeyrissjóð og fá greiðslur úr lífeyrissjóði  á eftirlaunaldri.Hins vegar eru þeir,sem  ekkert fá úr lífeyrissjóði og hafa eingöngu tekjur frá almannatryggingum á eftirlaunaárum. Staða  hópsins  sem hefur engan lífeyrissjóð er lökust meðal lífeyrisfólks.Sá hópur getur ekki framfleytt sér í dag á þeim lífeyri, sem hann á kost á.Hinn hópurinn er talsvert betur settur þrátt fyrir allar skerðingar og skatta.En það ríkir óánægja í báðum hópunum.Það má segja að  lakari hópurinn sé að berjast fyrir lífi sínu.Eins og kjör þess hóps eru í dag er engin leið að framfleyta sér af þeim lífeyri, sem er til ráðstöfunar þar. Stórir liðir eins og lyf eða læknishjálp eða báðir þessir liðir  verða útundan.Þetta er óásættanlegt og til skammar fyrir ríki,sem vill kalla sig velferðarríki.Það þolir enga bið að leiðrétta lífeyri þeirra, sem eingöngu hafa tekjur frá TR
 

Hinn hópurinn er miklu betur staddur, þ.e. sá,sem hefur greiðslur úr lífeyrissjóði og jafnvel aðrar tekjur einnig.Enda þótt margir í þessum hóp sæti gífurlega miklum skerðingum er staða þeirra samt miklu betri en hinna.Auk þess er það svo , að í þessum hópi eru meiri eignamenn, þ.e. fólk,sem á hússeignir, skuldlausar eða skuldlitlar.Það breytir öllu um afkomuna á efri árum.Miðað við stöðuna hjá eldri borgurum í öðrum OECD löndum ætti staða eldri borgara á Íslandi að vera miklu betri en hún er í dag.
 
Upplýsingar og útreikningar dr. Hauks Arnþórssonar leiða í ljós, að íslenska ríkið greiðir miklu minna til eftirlauna  en nemur meðaltali slíkra greiðslna í OECD löndum, ef miðað er við hlutfall af vergri landsframleiðslu.Gera verður þá kröfu til íslenska ríkisins, að það það lyfti sínum eftirlaunagreiðslum upp í það sama og gerist erlendis, a.mk. á meðan hagvöxtur er meiri hér en í samanburðarríkjunum.Íslenska ríkið greiðir í eftirlaun til eldri borgara á árinu 2017 alls 36 milljörðum minna en nemur meðaltalsgreiðslum OECD ríkja  til eftirlauna, miðað við hlutfall af vergri landsframleiðslu. 
 

Meðaltal  greiðslna OECD ríkja til eftirlauna aldraðra er tæplega  8% af vergri landsframleiðslu eða nær fjórfalt meira en hjá íslenska ríkinu. Á Ítalíu greiðir ítalska rikið tæplega 16% af vergri landsframleiðslu til eftirlauna aldraðra eða nær 8 sinnum meira en hér.Hvernig má það vera, að munurinn sé þetta mikill.Þessi samanburður undirstrikar, að íslensk stjórnvöld hafa hlunnfarið eldri borgara á Íslandi;  Það er tímabært, að staða aldraðra á Íslandi verði leiðrétt,   ríkið geri jafnvel við þá eins og gert  við eldri borgara í öðrum löndum Evrópu.

 

Björgvin Guðmundsson

 

Birt í Mbl. 12.júní 2018 

 

www.gudmundsson.net