Verið að svíkja aldraða og öryrkja um bætur. Fá 4% í stað 15-20%

Alþýðusamband Íslands, Öryrkjabandalag Íslands og Landssamband eldri borgara mótmæla harðlega þeirri ákvörðun ríkisstjórnarinnar að hækka elli- og örorkulífeyri um einungis kr. 4.000-5.000 í kjölfar nýgerðra kjarasamninga.

Í yfirlýsingu samtakanna segir, að megin markmið verkalýðshreyfingarinnar í nýgerðum kjarasamningum hafi verið, að bæta kjör þeirra verst settu í þjóðfélaginu og í samræmi við það hafi  aðildarsamtök ASÍ og SA náð samkomulagi um hækkun lægstu launa um 18.000 krónur á mánuði. 

„Við frágang kjarasamninga var talað um sögulegt samkomulag og almenn sátt og ánægja ríkti í samfélaginu um þá leið sem farin var, enda lýsti ríkisstjórnin sérstaklega yfir ánægju sinni með þessar áherslur. 
Það þarf enginn að fara í grafgötur með að fjöldi fólks í hópi öryrkja og aldraðra eru meðal þeirra sem lægstar hafa tekjurnar í okkar þjóðfélagi.  Það skýtur því algerlega skökku við að bætur lífeyrisþega eigi í kjölfar nýgerðra kjarasamninga aðeins að hækka um 4%, sem jafngildir kr. 4.000-5.000 hækkun á lægstu bótum.  Hvernig ríkisstjórnin getur komist að þeirri niðurstöðu að 18.000 króna hækkun lægstu launa á vinnumarkaði samsvari hækkun bóta almannatrygginga um 4.000-5.000 kr. á mánuði er óskiljanlegt. Sú upphæð er eins og við blasir aðeins lítill hluti þess sem samið var um í kjarasamningunum.

Það er því ljóst að ríkisstjórnin er með þessari ákvörðun sinni að ganga þvert gegn grundvallaráherslu og markmiðum kjarasamninganna – markmiðum sem hún áður hafði tekið undir og samþykkt.  Með ákvörðun sinni er ríkistjórnin að svipta lífeyrisþega mikilvægum og nauðsynlegum kjarabótum. 

Alþýðusambandið, Öryrkjabandalagið og Landssamband eldri borgara krefjast þess að ríkisstjórnin standi við fyrri yfirlýsingar sínar og hækki bætur almannatrygginga til jafns við kjarasamninga –það þýðir hækkun um kr. 18.000 á mánuði fyrir þá sem eru á lægstu bótum," segir í yfirlýsingunni.

Ég tek undir mótmæli ASÍ og samtaka aldraðra og öryrkja. Það er verið að svíkja aldraðra og öryrkja um bætur,sem þeim hafði verið lofað.Þeir áttu að fá sömu hækkun og verkafólk. En þeim er skammtað 4-5 þús. þegar verkafólk fær 18000 kr. og margir 5,5% hækkun til viðbótar. Aldraðir og öryrkjar eiga því að fá 15-20% hækkun í stað 4%.

 

Björgvin Guðmundsson

 

Segja ekki staðið við samkomulag um hækkun bóta