Mörður: Flytja á Paul Ramses aftur til Íslands

Mörður Árnason,varaþingmaðyr,skrifar athyglisverða grein  um Paul Ramses.Hann segir m.a.:

Um landið fer bylgja undrunar og reiði vegna þeirrar ákvörðunar í Útlendingastofnun að vísa úr landi Páli Ramses frá Keníu. Enginn efast um að hér sé pólitískur flóttamaður á ferð. Hann leitar til Íslendinga vegna þess að hann þekkir okkur af góðu einu – starfaði fyrir íslensk hjálparsamtök í heimalandi sínu, ferðaðist hingað fyrir nokkrum árum og hefur sérstök tengsl við íslenskt samfélag. Um leið og Páli Ramses er vísað úr landi er sundrað fjölskyldu – eftir situr eiginkona hans, Rosemary Atieno Odhiambo, og barn þeirra hjóna, brjóstmylkingur.


Samkvæmt Dyflinnarsamningnum er ríki heimilt að senda hælisleitanda aftur til fyrsta komulands, en ríkinu er alls ekki skylt að gera þetta. Ríkið sem flóttamaðurinn leitar í hælis getur ákveðið að senda hann ekki til fyrsta komuríkis heldur fjalla sjálft um mál hans. Þetta hefur einkum verið gert þegar grunur leikur á að málsmeðferð sé lakari eða léttvæg í komuríkinu – sem á sérstaklega við um sum þeirra ríkja sem flóttamenn sækja helst til. Grikkland er skýrasta dæmið en ítölsk stjórnvöld eru heldur ekki vel þokkuð á þessu sviði. Mannúðarástæður eiga einnig að koma hér við sögu.

l
Í svari dómsmálaráðherra við fyrirspurn á þingi í vor kemur þó í ljós að íslensk stjórnvöld hafa aldrei fjallað um mál hælisleitanda sem heimilt er að fela fyrsta komuríki að annast. Útlendingastofnun hefur aldrei – af mannúðarástæðum, vegna tengsla við Ísland eða aðstæðna í fyrsta komuríki – séð ástæðu til að taka sjálfstæða afstöðu til óskar um hæli á Íslandi. Þetta heitir á góðri íslensku að sleppa billega.

En nú er nóg komið af þessum leik í skjóli samningsins. Dómsmálaráðherra á þegar að ógilda ákvörðun Útlendingastofnunar, kalla Pál Ramses aftur til Íslands og taka mál hans til sjálfstæðrar meðferðar.

Ég tek undir með Merði. Ráðherra á að flytja Paul til Íslands á ný og láta taka mál  hans til sjálfstæðrar afgreiðslu. Það var ekkert búið að fjalla um mál hans. Það er málamyndaástæða að flytja hann til þess lands ,sem hann kom frá,vegna þess að það sé heimilt. Paul ætlaði til Íslands og hann komst ekki nema koma í gegnum annað land.

 

Björgvin Guðmundsson